【星爺講波 05】C朗領葡軍第六度爭標 誓取褪色捷克響頭炮

重點推介：葡萄牙 Vs 捷克：加東時間周二(18日)下午 3:00

明日歐國盃第五天兩場分組賽完成之後，決賽周24支球隊就全部亮相過，係龍係蛇，球迷應該心裏有數。呢一日嘅焦點，梗係第六次代表國家隊進軍歐國盃嘅風雲人物C朗拿度代表嘅葡萄牙，出戰東歐球隊捷克。

葡萄牙喺歐國盃外圍賽表現相當不錯，教練馬天尼斯帶領下，佢哋以冠絕全歐嘅十戰十勝成績，毫無懸念以小組首名出線，攻防兩端都有相當出色嘅發揮。至於而捷克喺外圍賽表現相對失色，小組只排阿爾巴尼亞之後以次名出線。

睇返近五場友誼賽成績，葡萄牙取得三勝兩和，當中最亮眼嘅係贏晒三大歐國盃奪標熱門——英格蘭、德國、法國，證明佢哋力足對抗任何一支強隊。反觀捷克方面，近五場友誼賽成績較為反覆，兩勝一和兩負，兩場贏波對手只係歐洲二線軍奧地利和瑞士，表現一般。

球隊人腳方面，葡萄牙前鋒線有C朗拿度呢位老將坐鎮，仲有拉菲爾利亞奧、祖奧菲歷斯等年輕新星，配合大勇大熟嘅中場般奴費南迪斯和貝拿度施華，進攻火力相當猛。而後防線由老將比比同魯賓戴亞斯領軍，防守亦相當穩固，老土啲講就係攻守兼備。

捷克方面，前鋒柏德列舒希克係佢哋嘅主要得分來源，中場由蘇錫克和安東連巴拿克發辦，防線則靠古法爾、維迪克鎮，整體實力只能算中規中矩。

講到戰術部署，馬天尼斯一向喜歡高壓逼搶同快速反擊，預計今場會打433，希望利用C朗嘅經驗同拉菲爾利亞奧嘅速度，喺捷克防線上製造威脅。捷克方面，統帥夏錫可能會選擇442，以穩固防守為主，再伺機利用舒希克嘅突破能力反擊。

睇返兩隊對賽成績，葡萄牙略佔上風，尤其喺2012年歐國盃八強賽事，葡萄牙1-0擊敗捷克，當時入球嘅正係C朗拿度。呢次相遇，捷克希望報回一箭之仇，但葡萄牙陣容實在太強，難度都幾大。

星爺估計，葡萄牙今場應該會佔盡上風，尤其係C朗拿度嘅領軍下，佢哋嘅進攻火力值得期待。我個人大膽預測今場比賽，葡萄牙會大勝捷克3球或以上。

AI預測：

F組 土耳其 Vs 格魯吉亞 (中午12:00)

預測賽果：土耳其勝

半場比分：土耳其 1-0 格魯吉亞

全場比分：土耳其 2-1 格魯吉亞

總入球數：3球

F組 葡萄牙 Vs 捷克 (下午3:00)

預測賽果：葡萄牙勝

半場比分：葡萄牙 1-0 捷克

全場比分：葡萄牙 3-1 捷克

總入球數：4球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】