【黃庭桄專欄】八公八婆

人是充滿好奇心的動物，俗稱八卦。

當你見到兩三個同事圍在一起，細聲講大聲笑，你是不是會走上前搭訕：「喂，講緊乜野啫，八嚟聽吓啦！」

如果話題牽涉到同事A和上司B的曖昧關係，眾人準會越講越興奮，加鹽又加醋。「唔怪之得啦！嗰日我見到邊個同邊個喺公司Canteen撐枱腳……有時邊個會買埋早餐畀邊個㗎……你有冇留意到佢哋兩個Instagram，分別放咗行山相，仲唔係拍拖睇日落咩……」

有時候，某同事在吃飯時收到WhatsApp，然後嘴角含春甜笑，坐在旁邊的八婆同事即會起哄，「我偷睇到係Edwin嘅Message喎！佢係咪你男朋友？做邊行㗎？拍咗幾耐拖啫？」明明是休閒午餐，驟變逼供大會，好煩呀！

「好心你咪咁八卦啦！」某同事四両撥千斤，冇佢咁好氣。

假如玩一個心理測驗遊戲，放一個類似抽獎箱的盒子，在盒面上寫上：「請勿打開，否則會嚇親，後果自負。」你猜猜，會有幾多個人懶理警告，照樣打開盒子，窺探內里乾坤呢？

有理由相信，十個人之中，會有至少一半人，先是左顧右盼，見沒人留意之後，就扮路過，腳步移近枱面，戰戰兢兢地打開盒子。只因，人皆有八卦之心。

有些女藝人，即使見慣風浪，勇於面對網友的毒舌批評，也表面豁達表示：「我唔會睇佢哋啲留言，無謂影響心情。」

話雖如此，她又會心癢癢，忍不住在帖子下面，逐個留言瀏覽起來，「我想睇吓佢哋鬧得有冇道理吖嘛！」到頭來，明明是藍天的心情，平白翻起水龍捲，心鏡徒惹塵埃。