【黃庭桄專欄】一朵鮮菊插哪兒？

歌手菊梓喬戀上細四年的保錡，不少人拿來剝花生，揶揄保錡樣貌似八両金，又將菊的前男友吳卓羲拿來作比較，指菊的品味越來越差，無論外貌、知名度和成就，保錡都差吳卓羲幾皮波。好一段姊弟戀，不被網民看好。

保錡抵不住頸，在網上留言反擊網民：「我係樣衰啊，得唔得吖？佢（吳卓羲）靚唔靚仔，關我咩事呀？」

愛情故事不會有夢幻童話，有幾多對是郎才女貌門當戶對呢？見過不少新人拍婚紗照，新娘子是貌美如花，新郎哥卻沒有韓星的高大俊俏，有些反是肥頭耷耳，有些則是一副財大氣粗的土豪格，有些是年紀相差一大截，談不上匹配。

「梗係貪個男人啲錢啦！又或者係兩大家族聯婚，點會有真愛啊？」三姑和六婆站在一旁竊竊私語，剝得滿地瓜子殼。

女人怎樣選擇伴侶，會有一百萬個答案，人人各有不同。

佩君不會揀靚仔，因為怕太多浪蝶送上門，對方容易出軌。桂儀抗拒嫁入豪門，不想成為籠中的金絲雀，深閨寂寞。寶珍寧願要一個聽聽話話的觀音兵，唯命是從。喜華只想要一段細水長流的關係，一起牽手到老，外貌身家都不重要，即使一齊捱世界，也是甘甜。

有說男人不壞，女人不愛。我見過不少女友人，愛上口甜舌滑風流花弗的男人，「你不怕對方用情不專嗎？」我問。

「但我同他一齊時，他經常講笑話，𠱁得我好開心。」女友人表示寧願激情一個月尋開心，總好過獨守空房十年。到頭來不能修成正果又如何？至少曾經快樂過。這也是菊梓喬的心聲嗎？