【黃庭桄專欄】星期Two的父子情

陶大宇是重孝的人，即使平日如何忙於在內地穿州過省登台商演，每個月都一定會抽時間，回港探望九十四歲的媽媽，只因爸爸死得早，在大宇十八歲時病逝了。

陶媽媽獨力撐起一頭家，這份恩情，陶大宇永遠銘記。

當年陶大宇報考藝員訓練班，陶爸爸大力支持，更親筆替他填寫報名表格。「老竇係一個學者，在《讀者文摘》負責翻譯，佢成日話見字如見人，如果手字烏喱單刀，老闆睇見都唔會想請你啦！」

原來當時陶爸爸已確診癌症，一筆一字，都寄予望子成龍的祝福。

1982年的暑假，爸爸在醫院留醫。只有十八歲的大宇忽然記得，爸爸曾交帶他，得閒便去私人信箱拎信。當他拿著一疊信去到醫院，一推開房門，便見到媽媽捉住爸爸的手不停喊。

他是咁多兄弟姊妹中，唯一可以在爸爸床前送終。

「我喺佢耳邊講：『老竇，你放心走啦，我一定會盡我所能照顧媽媽。』」

就在爸爸出殯當天，上午送上山，下午陶大宇便一身白色素服，去到藝訓班的面試場地，百般滋味，縈繞心頭。

陶大宇最難忘是爸爸的文化水平高，平日電視只睇英文台，課餘讀本一定是《讀者文摘》，「有次我同老竇講，想攞星期Two嗰期睇，老竇聽到火都嚟：『Tuesday就Tuesday啦，乜嘢星期Two啫！咁星期三個英文係乜嘢？』」

「咪星期Three囉！」陶大宇的答案，激到爸爸生蝦咁跳，「我嗰時淨係掛住玩，今日諗返起都幾好笑！」

一幕幕笑料，一段段天倫親情，豐富了陶大宇的生命故事。