黃庭桄-專欄
2024-05-17 11:01:14
【黃庭桄專欄】夢中見
歌仔都有得唱:「最心痛是,愛得太遲……」我愛聽朋友訴說跟父母的相處點滴,特別在面對生離死別時的感觸,如何千方百計去迎抗死神,如何把握最後的時光,好好共度,好好去愛,好好留住溫馨的思憶印記。
陳敏之說,在二十四歲時,爸爸發現有末期肺癌,確診一個月後,有一天暈低,送院翌日便離世。晴天霹靂下,她不斷喃喃自問,點解會咁樣?爸爸還未見證她結婚生仔,還未等到她賺錢去報答劬勞,還未睇到她長大……
心如刀割的悲傷,令她全日沒胃口,只以飲水代替三餐,消瘦到只得九十多磅,良久也未能釋懷。
到了今年1月,陳敏之的媽媽,也被血癌帶走了。這一次,她早有心理準備,因為醫生說預計只餘兩至三個月命。
於是在倒數的日子,她陪伴媽媽,去做喜歡的事,例如搓麻將、旅行等。去年10月,她一家人去了泰國,媽媽最愛在酒店泳池游水,陳敏之特別把開心時刻拍下短片,「當媽媽游去我身邊時,我問佢開唔開心,佢話:『正呀!』我知道佢好快就會走,所以想拍低留念。」
當陳媽媽入住私家醫院,陳敏之會留在醫院過夜,全天候照顧,衣不解帶。「我唔怕死㗎!我遲早都要上天堂㗎啦!」因有信仰,令陳媽媽走得安詳,也比醫生預期活多一年。
在殯儀館見到媽媽的遺容,陳敏之甚至想出手替媽媽化妝,「我想佢可以好靚好靚咁走。」
濃濃的母女情,留下只有思念。在這段陰陽相隔的日子裏,陳敏之夢見過媽媽數次,「我相信係佢求天父通融,畀我哋夢中再見。」