黃庭桄-專欄
2023-09-21 12:15:14
【黃庭桄專欄】迷信
很多人雖然是無神論者,在日常生活裏,卻會十分迷信,諸多顧忌,甚至賴三賴四。
像在吃飯點菜時,大家七嘴八舌點選喜愛的菜式後,總會有人問侍應:「請問我哋一共叫咗幾多道菜?」
「七個餸。」侍應逐一覆述菜名後,作出總結。
「唔得!一定要叫多一道菜,七呢個數字唔老黎啊!」朋友解釋,因為喪禮之後的解穢酒,俗稱「食七」,那餐飯只會有七道菜。所以平時良朋共聚,都會避忌,大吉利是咩!
也有人在街上,如果不慎跌了硬幣,是不會拾起來,因為在農曆七月燒完街衣後,善信都會習慣拋擲碎銀在路上,用意是引開靈體去撿拾,以免尾隨自己。
計我話,如果是跌一毫子或兩毫子,我可能會嫌地面污糟而放棄執起來。萬一是跌十元或五元硬幣,我一定會執返,最多用紙巾包住,拿回家沖洗,隻手就馬上用酒精搓手液消毒。錢喎!明明是屬於自己,怎會因為疑神疑鬼,而棄之不理呢?
不少賭仔朋友,有時會心情煩躁地投訴:「今日真係當黑,頭先搭車返公司,竟然見到和尚呀!我今晚跑夜馬,仲使贏錢嘅?」
我好奇問,和尚跟賭馬有甚麼關聯呢?「和尚講求四大皆空,賭馬係貪求財富,兩者矛盾吖嘛!畀個和尚邪一邪,我唔使旨意贏大錢啦,隨時輸到荷包同褲袋皆空啊!」
「姓賴」的朋友,往往有數不盡的迷信藉口,例如抽獎抽不到、行街拗柴、確診兩條線、遺失八達通、女神拒絕約會…… 「呢輪好似幾當黑,一於買啲碌柚葉沖下涼先。」
如果做一點事能令自己心安理得,又不影響別人。迷不迷信,有時也無傷大雅。