【黃庭桄專欄】笑談廣東話

朋友忽然考我中文：「到底『靜雞雞』靜啲？抑或『靜靜雞』靜啲？」
　　
哈！我又真的從來沒有細想，但兩種說法都有講過。
　　
「我就覺得，靜雞雞有兩隻雞，一定會嘈啲。而靜靜雞有兩個『靜』字，自然會靜得多啦！」
　　
既然朋友擺下中文擂台，我嘗試回贈問題：「到底係冇陰功啊？定係陰功呢？」
　　
朋友思索了片刻，嘗試作答：「以慘情悲歎程度來說，冇陰功係比起陰功，會再慘啲。」他舉一個例：「佢新婚兩個月就守寡，仲要啱啱有咗BB，真係陰功囉！」
　　
冇陰功，即是沒有積陰德，今世易遭逢厄運，例句如下：「佢畀老公虐打，仲要孭埋老公成百萬賭債，自己又剛剛驗出生癌，仲要被裁員，屋漏兼逢夜雨，真係冇陰功囉！」
　　
廣東話是饒有趣味性的方言，往往同一個詞語，會有不同的發音，約定俗成，已經弄不清孰對孰錯了，例如：「黑鼆鼆、黑媽媽、黑咪鼆」，你又會講開哪一個呢？
　　
不妨考考大家，請問以下哪個形容詞，才是最蠢的人：「咁鬼死蠢、鬼死咁蠢、正死蠢、蠢過隻豬、豬咁蠢。」
　　
又例如：「你覺得『鬼死咁痛』會痛啲？或『咁鬼死痛』痛啲？定係『鬼咁痛』痛啲？還是粗口『好X痛』會痛啲呢？」
　　
如果叫別人閉上眼睛，你的用詞會是「合埋眼」、「Hip埋眼」、「恰埋眼」或「瞇埋眼」呢？
　　
正如「愛上一個人」五隻字，已經有至少四種意思，可以是愛上了一個人生活，可以是深愛著某一個人，可以是愛上一任的情人，也可以是愛跟某個人發生性關係。看！廣東話幾好玩！