【曾智華專欄】「潮州精神」一定輸

上周日賽馬，有兩件事「好好玩」。第一是黃寶妮成為最快開齋W出的女見習騎師，不過，大家可再三睇片，欣賞當日佢點勝出，真真「由頭到尾都咁好味」！

　相信事前好多兄弟都「知」佢要/會Sure Win，故大家非常識做，一齊「睇風景」。尤其次熱、三熱兩大師傅潘頓及田雞，更發揮「唔知跑咗去邊」的超級絕技。

不過，呢類賽事有人縮，當然有人「去」，邊隻？正是其他一級高手的冷門馬也。布文正正表演從後殺上，睇準唔會破壞大局，然後啱啱輸少少超級功力。呢場Q有近700元，二重彩1140元，肯定「皆大歡喜」啦，但普羅馬迷冇份！

另一搞笑為小弟上周六在專欄正頭正路貼「潮州精神」拖「神虎龍駒」、「健康愉快」。

結果腳中晒，但「潮州精神」去咗邊？大家又可以睇片，欣賞高手巴度點輸。資深馬迷睇佢轉彎已知死硬，因佢飛出外檔大力推騎，擺明盡快用晒隻馬段力，好野吖！

其實早一晚老友「馬王輝」已拉我講：「碌Sir，你貼『潮州精神』W，我就話佢瓜硬。不是隻馬唔夠實力，而是……大佬呀，『慶典盃』呀，你隻潮州佬點可無大無細？識做啲，當然縮埋，畀『中華盛景』去啦，咁就超級政治正確嘞，你咪咁儍以為賽馬單跑實力呀！」

輝哥係咪陰謀論？無法證實，但跑出結果正是如此，小弟又上了一課。

今晚快活谷賽事，擺明今季爭冠軍練馬師的希斯，空群而出，布陣7隻，運都贏埋，除「建測英」抽九檔外，其他全部六檔或以內，隻隻有機W或P。

我會由第一場「樂天派」開始捧，場場要預埋佢旗下戰馬，記住，切勿忽略牌仔黃智弘的「雅典武士」及「冠寶駒」，兩場皆有澳洲大師傅負責「遮蔭」呀！