【曾智华专栏】马季初两大反高潮

马季一开，最大反高潮有两个：一为靓女见习练师黄宝妮，首次出赛即杀入冷位第三，立时被捧到上天。可惜第二次再出食足七场白果（全部正常赛果），结果班儍吓儍吓乱追捧者输甩裤，老羞成怒在
网上狂插。大佬呀，你乱买乱捧，首先应插自己「有眼无珠」，为乜输又唔认，打又唔企定咁冇品？

另一反高潮当然为「软硬鞭」潘顿继续只手遮天，任开任玩。无法，骑功佢最高，加上霸晒好马（当
然有因有果），马迷买佢，W出肯定冇味，毫无兴奋感；唔买佢又大镬，分分钟被佢笃爆。

讲返明日赛事，季初难有高潮，平庸马先出，大马房用呢两个月来扫马，年纪大又冇乜前景的，安排出赛，得就得，唔得就大脚忽得，一系退役，一系扫走。

明天有场水波三级赛，睇见牌面都唔开胃，渣渣哋都叫「庆典杯」，竟只得六个马房捧场，七只马恍如「阿叔竞跑」，四只6岁以上，乜潜质都见尽，唯独「潮州精神」在上升中。

上仗「潮州精神」轻风送爽胜近两马位，被重手加7分，立即再出，继续跑千四米，必须睇住。

「神虎龙驹」最高分，此马盛年已过，只可吼准在杯仔及一班赛发难，今次最多入位。

「威力奔腾」次高分，7岁老马，上季经常入位而只W一场，今次又系二二三三。

最有机会威胁「潮州精神」为另一匹高分老马，8岁的「健康愉快」，睇嚟想尽地一煲，然后退役。此马去季初正是在千四米博得一W，之后全季游马河，唔退役又冇转仓，应在罗富全心中仍有奖金赢。其他三匹，唔睇嘞。

总结，二重彩「潮州精神」复式胆拖「神虎龙驹」、「威力奔腾」及「健康愉快」。