【曾智华专栏】「嘉应高升」Win硬？

马季开锣，又有长达10个月兴奋期喇！记住人脑要不停用，可以度乜都得，但必须不停度度度。小弟一周两次度马，但觉脑筋暂时未有退化现象，相比同辈有啲话退休就身心退休，一日悠悠闲，真系睇住佢哋由手脚到脑筋都慢慢「退休」㗎。

明日戏肉「特首杯」，跑一班千二米，有点反高潮，因只得十匹马畀面报名，巨星马摆明唔多吼呢只「高班杯仔」。不过，你唔吼，作为马迷的我照度。

个个话呢场冇得跑，上季最大进步马匹「嘉应高升」Win硬，由52分起步，跑七场五W两Q，加到111分，摆明今季国际赛棋子，加上潘顿由田泰安手上取回帅权，亲自田草试闸又第一，磨到利晒，边有得输呀？

同意同意。但跑马跑马，总可能有意外，兼且W大热啫，有冇冷脚出现呀？

呢场有几只可以飞起，包括「电气骑士」、「八骏巨升」及「人和家兴」，皆快活谷马，突然转来沙田，面对马王级，摆明垫底，热吓身算。

「美丽奔驰」又如何？上季跑八场只执一W，95分，坐马监。

「幸运有您」上季初博完四场，即刻谢过「谢老四」，103分，要有排减才见曙光。

吕厩「包装必胜」本有多少机会，奈何上季吕健威为争冠军，鉴粗最后一日仍博，脚都软埋。

意即只剩下三只可跑二二三三。当中「水晶酒杯」上季最稳定，出九场三W三Q，呢场最低分，可博入脚。

另外两匹，若「嘉应高升」略有闪失，即可揭竿而起！贺厩「威力奔腾」上季尾仍大勇，今番由巴度转布文，摆明伏兵。最大机会炼低「嘉应高升」为「美丽第一」，上季尾千二米一战，轻松弹赢个几马位，仍有几多在手，未知，用佢做胆！