【曾智華專欄】見到佩通坦就想笑

久違了泰國，決定10月再去，體會一下當地獨特的自由氣氛，來幾頓出色泰國菜，然後享受其高質素的酒店服務。

曾幾何時每年都去布吉島一次，直至出現大海嘯，見證滿目瘡痍，被海神威力嚇怕，作為香港人，慘況難以想像。之後，對當地已失卻興趣。

最近重新想去泰國，有多少因其「趣怪」政局，竟然選出一位嬌嬌女佩通坦出任總理（當然是前總理他信的魔術棒），過程離奇古怪。

其實他信一直是近半世紀最強勢的總理，就算被逼流亡的大段日子，明顯仍對泰國政局有相當大操控能力。

好玩在佢流亡時長期居港。早前相信與最高權力的國王傾掂數，有晒默契才回國。離港前，老友親眼見證佢在九龍半島酒店大堂，在大群看似律師團圍簇下，簽署文件，然後起程。

唔使高人創作，大家都知劇本是他信回國後，先「扮演」囚犯，但獲得高度自由，然後被特赦，變為「普通人」，而佢就會作幕後操控者，決定幕前演員。

好玩在布局由法院經過審訊，指佢隻「馬」賽塔嚴重違反政治操守，罷免之。而賽塔也充分合作，配合再選總理，然後，一面倒票數選出個三十七歲，從未經歷政治風浪的娃娃總理，他信孻女佩通坦。

從此，他信又再大權在握有排玩。小弟見到呢個鋪排，有點想笑。因腦海不停想像，「娃娃總理」既為一國元首，當然要外訪，又或平起平坐接待他國元首。咁⋯⋯當佢與「老狐狸」普京、「狂特」特朗普⋯⋯以至習近平見面時，會點Behave呢？而上述幾位又會點睇佢呢？

究竟係咪要安耳機，由他信秘密指揮一切對答呢？越想越好笑呀。