【曾智華專欄】谷鬼氣的「事頭婆靚湯」

出外覓食，小弟平均每周四晚，基本香港略具知名度的中菜，全部試勻。

一般落筆，多會善頌善禱，唔得的就講少句，同情經營者生意難做；得的，尤其中小型食肆，必定推介，作丁點鼓勵。

深知今時今日香港環境，不應太苛求。不過，若遇上「大名店」，反正生意長旺，略略要求高一點，也算正常吧。

例如你收得五百元過外號稱「燒鵝大王」，就唔該你交足貨！「五六七八記」牛腩也如是，並不因內地同胞慕名排隊就等如正。尤其服務，若店太欺客，間接搞壞香港飲食業印象，大家必須出聲。

罕有地，上周又一餐食到滿肚氣。

「快樂傳媒老是佛」今月輪到小弟做東，選定最近頗多人談論的灣仔名店「X記」，剛剛搬新址，即以捧場之心殺去。

早早訂位，向負責人要求：「望盡食招牌出品，十二個大男人，價錢冇乜問題，麻煩你設計菜單！」傳來的菜單，想食的全部有齊：煎焗魚腸、油泡鮮魷、懷舊蝦多士、煎釀順德鯪魚、蝦子柚皮、生炒即炸排骨、枸杞浸黃沙豬膶、拆肉泥鯭粥、豉油王炒麵加韭菜芽菜，尤其過癮為有味「事頭婆靚湯」。

日子到，十二條大漢殺去，爆滿，如此好生意，證明出品應該有保證⋯⋯啩？

上菜！第一味油泡鮮魷亮相，人人你眼望我眼⋯⋯咁細碟，點搞？大家知書識禮，互推你食先、你食先⋯⋯第二味仲大鑊，蝦子柚皮只得兩件，十二人點分？作為主人家的我冇晒癮，因必定被誤會⋯⋯使唔使咁孤寒？

即搵經理加碼再來一碟。

到「事頭婆靚湯」上，出事，少少瓜類滾少少冰鮮豬骨，淡到連大排檔「例水」都不如。「老是佛」個個搖搖頭，你眼望我眼，個心就⋯⋯