【曾智華專欄】扮女人．好興奮

今期上映的兩套電影，皆能令全院充滿笑聲，消暑之作。《老嘢時速》過足癮，而《男航女機師》也似邊睇邊在歎青檸梳打——爽。

其實兩套並非甚麼經典大片，也不會得到電影獎項，但勝在娛樂性濃，兼且唔使用腦，人人大概開場估到結局，但卻可享受整個劇情發展。

《男航》為一人表演電影，韓國人氣偶像曹正奭由頭帶到尾。劇本帶出不少你我人生際遇，尤其觸及一個保守社會中的男女性地位變化。我初次踏足首爾為上世紀70年代，四十多年前的韓國，極度大男人主義，女性地位低微。最深刻印象的一幕，為當地男人過馬路，喜歡橫衝直撞，女性只可閃避讓開。晚飯時，一般女性都只坐在男人旁邊侍奉，絕少齊齊同一地位進食。

五十年過去了，這種重男輕女文化，已徹徹底底地改變。韓國男人想維持昔日的輕蔑女性？結局是分分鐘被投訴、炒魷，再列入黑名單，永不翻身。

片中本來事業如日中天的曹正奭，正正因為一次酒後失當行為，人生一鋪清袋，空有超級駕駛航機技術而冇人請，點搞？終要扮女人應徵低一級的副機師？

《男航》看似笑片，其實內藏「教育」，包括對父母、對家庭、對同事、對異性⋯⋯

曹正奭扮女人，犧牲不少，先要減去15磅贅肉。佢戲中扮相，令我想起認識過的部分大男人，其實有濃濃的扮女人欲念。或許是天生的，但基於世俗眼光，日常要強力壓抑。點釋放？有嘞，正是凡公司周年晚會或聖誕Party，一於扮女人可也。

見過一位老友，凡穿起絲襪高跟鞋，戴上胸圍及假髮，立時會進入十級興奮狀態，擺明極其享受也。