【曾智华专栏】大把客但冇得做

网上日日公布食肆执笠，不少有相当历史，例如土瓜湾美善同道的「苏三茶室」，经营二十年，积下不少熟客，但结果仍公布9月下旬结业，原因是——唔够客。

令人非常气馁，是不？但奇在佢隔篱两个舖，刚刚又有一间Cafe开业，显示市况仍是有人辞官归故里，有人漏夜赶科场。

其实就我观察，香港饮食业并非无客。最简单，我身边最少有几百为食鬼，不停想揾好嘢食，一听到边间正，就飞扑而去卜位。

例如早前重新开业的阿鸿小吃，以及几年前因身体筋骨严重劳损休息，刚刚唞够再战江湖的基哥，你想订位？非常难！

不过，大把客涌上门又如何？东主仍是满肚苦水喊咁口。

炒粉丝蟹煲及蒜子肥鳝炒到会飞的基哥，重新开业第一日，已「大受打击」。皆因佢新舖可以坐五围，早早订满晒。厨房佢自己孭起，楼面则亲妹阿Anne睇，两个拍硬档多年，基本上顶得住。但有个岗位必须请人，正是清洁洗碗！辛辛苦苦打晒锣揾人，结果有位阿婶肯做，条件——只收现金，150蚊一个钟。

听落几爽，只要每日做六个钟，即有900蚊Cash，做足三十日有27000蚊。

不过⋯⋯惨情，阿婶一返工，见到坐满五席，竟呻：「哗咁多嘢洗，唔做啦！」讲完就调头走。问你服未？结果当然又系老板兼大厨基哥同佢个妹孭埋。

基哥诉苦：「碌Sir，香港饮食业死症，不是无客，而是租金高，冇人手，点做？」

有饮食业老行尊报料：「其实不少阿姐一边收综援，一边做现金工，都唔知几疏乎，故此，少少辛苦都冇兴趣做，因为佢哋基本衣食无忧。」

摆明人手不足是死结，唔解决就揽炒，政府可以做乜？