【曾智華專欄】狂風暴雨酷熱運動場

每逢到QE心臟科覆診，醫生必問：「有冇做運動，每日做多久？」

有此一問，當然因為運動對三高、心血管病⋯⋯以至筋骨痛症病人極重要。

以前我絕對冇咁有恆心、有規律日日做，直至八年前搞出個坐骨神經痛及腕管炎，苦不堪言，行路好似「生嘢」咁一拐一拐，手又舉唔高，最弊冇覺好瞓，於是走去搵筋骨醫生。

最終唔使打針食藥敷藥，只畀佢推拿咗六次，然後教咗基本拉筋動作就搞掂。

「曾先生，你持之以恆日日拉筋得㗎啦，慢慢自然冇事，唔使搵我喇。」

點解醫師「趕客」？因佢醫務所爆到七彩，若非重症，咁就留返個位比其他病人可也，咪阻住地球轉。

嗰時開始，唔乖唔得，無論去到邊，乜嘢天氣，小弟必每日急步二十分鐘，出身汗，再由頭到腳踭拉筋二十分鐘。

效果明顯，每朝拉完，即刻鬆晒，行步路都快啲。長期日日做，更連坐骨神經痛也消失埋。

不過，現代人當然日日要用手機、iPad，於是肩周炎及腕管炎無法斷尾，時痛時唔痛。

近日不時狂風暴雨，又熱到飛起，攝氏三十幾度，戶外運動點可繼續？

有！哈哈，無論行雷閃電、八號風球、黑雨我都掂，就是非繁忙時間揸車到土瓜灣美善同道、落山道交界，泊車（通常好多錶位），入港鐵土瓜灣站B出口直落大堂，開始急步行，由落山道步行到浙江街出口，單程約五百米，來回就一公里，有冷氣，極舒服，來來回回三公里後就拉筋。邊度拉？走埋一二角，通常放咗鐵馬，咁就可以開波喇。基本上我行又拉，企又拉，推住牆都可以拉。四十分鐘後，舒服晒，回家淋浴。

各位，我呢個室內「運動場」（港鐵大堂），免費又好用㗎。