【曾智华专栏】狂风暴雨酷热运动场

每逢到QE心脏科覆诊，医生必问：「有冇做运动，每日做多久？」

有此一问，当然因为运动对三高、心血管病⋯⋯以至筋骨痛症病人极重要。

以前我绝对冇咁有恒心、有规律日日做，直至八年前搞出个坐骨神经痛及腕管炎，苦不堪言，行路好似「生嘢」咁一拐一拐，手又举唔高，最弊冇觉好瞓，于是走去揾筋骨医生。

最终唔使打针食药敷药，只畀佢推拿咗六次，然后教咗基本拉筋动作就搞掂。

「曾先生，你持之以恒日日拉筋得㗎啦，慢慢自然冇事，唔使揾我喇。」

点解医师「赶客」？因佢医务所爆到七彩，若非重症，咁就留返个位比其他病人可也，咪阻住地球转。

𠮶时开始，唔乖唔得，无论去到边，乜嘢天气，小弟必每日急步二十分钟，出身汗，再由头到脚踭拉筋二十分钟。

效果明显，每朝拉完，即刻松晒，行步路都快啲。长期日日做，更连坐骨神经痛也消失埋。

不过，现代人当然日日要用手机、iPad，于是肩周炎及腕管炎无法断尾，时痛时唔痛。

近日不时狂风暴雨，又热到飞起，摄氏三十几度，户外运动点可继续？

有！哈哈，无论行雷闪电、八号风球、黑雨我都掂，就是非繁忙时间揸车到土瓜湾美善同道、落山道交界，泊车（通常好多表位），入港铁土瓜湾站B出口直落大堂，开始急步行，由落山道步行到浙江街出口，单程约五百米，来回就一公里，有冷气，极舒服，来来回回三公里后就拉筋。边度拉？走埋一二角，通常放咗铁马，咁就可以开波喇。基本上我行又拉，企又拉，推住墙都可以拉。四十分钟后，舒服晒，回家淋浴。

各位，我呢个室内「运动场」（港铁大堂），免费又好用㗎。