【曾智华专栏】有得赢都唔会咁买

星期六，不如又讲吓马！

唞暑后不少马经版都推出各式统计，畀马迷用作为新一季投注策略研究基础。

资深马迷累积N年经验及「捐输」，必定有自己一套刨马准则。有啲睇骑师，有啲睇马房，有啲睇评分，有啲睇血统⋯⋯

最普遍是睇赔率。因若有人真金白银「藕」落某一啲马，绝不会是儍吓儍吓乱咁「掟飞镖」，必有其因，故此精明一族大部分时间会采用「跟钱走」作投注决定。另一种方法为「删除法」，每场二十倍以外的马，飞得，因「冇咁大只蛤乸随街跳」。而赛事日赔率明显与隔夜不同的，就分类研究。变冷的，打大交叉，应是出现咗负面因素。相反，无情情有人落重飞，令赔率急跌的，必须跟一注。

小弟属边派？赔率派！一场马若超过十只，边有时间逐一刨？最易是用剔除法。二十倍以上飞起；无厘头变冷的，又飞得；减吓减吓，只集中分析六、七只几倍到十几倍的马，WPQ一于此中寻。

认识不少资深马迷，认为有一种投注法，八成机会「长途赢硬」，但就是冇乜兴趣实行，正是半夹叠买冠军骑师潘顿。一万元做本，凡佢骑两倍以上的，就夹叠买W。

100元开始，输一场就变150元，再输买200元，再输300元……

过往纪录，潘顿约五场赢一场，W出马平均派彩率为38.57元。用或然率计，几场中一场，好快有收成。不过，佢亦会突然有一两日「游马河」食白果，咁你就一定吓到手震。

用此方法投注者，一定要豁出去，心态是将一万元视作游戏费，只等有机会爆场冷冷哋（例如上季「闪电」十六倍）开心吓。

呢个投注法，我全冇兴趣，除对「软硬鞭」有偏见外，只喜欢每场独立研究。