【曾智華專欄】江旻憓急需「鐵閘」

江旻憓（Vivian）一劍封后，香港不論左中右，一致興奮歡呼。香港絕難見到有一個名人會如此受全城擁戴，而冇Haters撲出來指手畫腳放暗箭的，只因Vivian實在太得人喜愛。

不過，隨之而來的日子，我開始有點替佢擔心，望佢快快搵到「鐵閘」幫手。

點解？正是人怕出名豬怕肥，更何況是如此完美的「人」？在資本主義社會，肯定人人都想借佢嚟「做啲嘢」，因形象如此高雅，佢黐埋任何商品、團體或人物處，被黐者的身份地位皆會有所提升。

上述的商品、團體或人物，黐住江小妹之前，會思考乜呢？當然是對自己有乜著數？至於對對方產生乜效果，則必冇興趣深究，講俗啲就是關人個關。

以Vivian今天的影響力，在商品市場肯定是天價。佢打劍咁叻，但論對商業世界內的一切，應是一無所知，咁點同大鱷周旋？

故此，江旻憓第一道「鐵閘」，就是個精明的經理人，負責擋駕，咪畀乜人都可以直接聯絡到佢。

然後再仔細評估一切商業、非牟利及慈善（肯定如潮湧到）的邀請。應推的，堅決推；認為可跟進研究的，也不用急，尤其商品代言人，必須諗清諗楚「化學效應」。

就算看似官方的一切「中性呼籲」，「鐵閘」也應冷靜研究接唔接，是否與形象配合？再講一次，請江旻憓的人，十個有九個都只是利用佢「搭順風車」，提升自己旗下的商品或活動之外，對Vivian有冇損害，當然唔理。

江旻憓另外必須做的是遠離政治。因一涉政治，即肯定有幾成人與你「唔同路」，如此會無無謂謂出現不少對頭人，故此，絕對咪儍吓儍吓借膊頭畀人亂用。總之，搵道乜都識的「鐵閘」保護自己！