【曾智華專欄】與黃牛角力的快感

黃牛，從來不是甚麼新鮮事物，小弟少年時代，凡想入場睇的大爆電影，例必早早「冇飛賣」，因為黃牛通過與內部職員打龍通，私相授受將門票壟斷，炒到高高賺錢。

這情況在上世紀六十、七十年代的足球場更盛，因當年香港充滿足球狂熱，尤其勁旅對賽，包括南華、九巴、愉園、星島、精工⋯⋯等等互撼，政府大球場必定早早紅旗高掛。想睇？一係爬山，一係幫襯黃牛！

今日寫黃牛，乃因最近出現假黃牛，用假門票扮炒黃牛，引誘無知網民入局。

警方手到拿來，一拉就五「件」，全部屬內地男子，意即是「內地假黃牛」也。

講到做黃牛，也並非一定賺錢的。若估計錯誤，入咗大手門票而滯銷，就要按情況大出血散貨，越近開騷日子及時間，黃牛叫價能力越低。除非個個係王菲、學友、鄭秀文啦，否則碰著啲個勢（造到）好似好好，但其實「虛張」的，黃牛可以蝕到噴血。

認識朋友中，有一對情侶A，極喜歡到紅館睇騷，但次次都唔會預先買飛，因有一鋪癮，與黃牛角力鬥耐性玩沙蟹。

即係乜？即係⋯⋯A情侶凡有大爆演唱會，就預先一小時到閘口搵黃牛，鎖定一隻：「阿哥，我睇又得，唔睇又得，嗱，你有飛賣唔晒就微信我啦（內地牛用微信），七折！」

起初黃牛多愛理不理，寸寸貢吊起來賣，原價加三至五成。A情侶調頭離開：「我去飲咖啡先，有多餘飛先啦！」

如此，半小時後黃牛就會來短信——加兩成。仍有十分鐘即開騷時又來短信——加一成。開騷後再彈出——原價。A情侶此時已知贏硬，幾大唔覆。通常開騷十五分鐘後，黃牛終於投降——怕咗你，平三成，唔好將呢個方法話畀人知呀！