【曾智华专栏】与黄牛角力的快感

黄牛，从来不是甚么新鲜事物，小弟少年时代，凡想入场睇的大爆电影，例必早早「冇飞卖」，因为黄牛通过与内部职员打龙通，私相授受将门票垄断，炒到高高赚钱。

这情况在上世纪六十、七十年代的足球场更盛，因当年香港充满足球狂热，尤其劲旅对赛，包括南华、九巴、愉园、星岛、精工⋯⋯等等互撼，政府大球场必定早早红旗高挂。想睇？一系爬山，一系帮衬黄牛！

今日写黄牛，乃因最近出现假黄牛，用假门票扮炒黄牛，引诱无知网民入局。

警方手到拿来，一拉就五「件」，全部属内地男子，意即是「内地假黄牛」也。

讲到做黄牛，也并非一定赚钱的。若估计错误，入咗大手门票而滞销，就要按情况大出血散货，越近开骚日子及时间，黄牛叫价能力越低。除非个个系王菲、学友、郑秀文啦，否则碰著啲个势（造到）好似好好，但其实「虚张」的，黄牛可以蚀到喷血。

认识朋友中，有一对情侣A，极喜欢到红馆睇骚，但次次都唔会预先买飞，因有一铺瘾，与黄牛角力斗耐性玩沙蟹。

即系乜？即系⋯⋯A情侣凡有大爆演唱会，就预先一小时到闸口揾黄牛，锁定一只：「阿哥，我睇又得，唔睇又得，嗱，你有飞卖唔晒就微信我啦（内地牛用微信），七折！」

起初黄牛多爱理不理，寸寸贡吊起来卖，原价加三至五成。A情侣调头离开：「我去饮咖啡先，有多余飞先啦！」

如此，半小时后黄牛就会来短信——加两成。仍有十分钟即开骚时又来短信——加一成。开骚后再弹出——原价。A情侣此时已知赢硬，几大唔覆。通常开骚十五分钟后，黄牛终于投降——怕咗你，平三成，唔好将呢个方法话畀人知呀！