【曾智华专栏】新猪肉应收「垃圾马」

马季结束，老友安排下，与某华籍练马师晚饭闲谈，当然趁机问一些长期埋在心中的问题，增长知识又好，八卦也好。

问：点睇新来的练马师？点才可企稳？

答：初来埗到，一定要先有马，未建立关系，唯有乜马都收。个别外来练马师极拣择，一睇不停减分又或五班货色，即不愿收。其实儍儍哋，你新嚟，最紧要有马赢，有表现，之后马主自然畀马你。佢哋睇马，以为不停减分及五班就是垃圾，其实不少已减到就快赢得，正是行运医生医病尾也。

问：点解某一两个华人牌仔咁惨，冇乜马骑？点解你哋华籍练马师唔畀机会自己人？

答：决定畀边个骑，权力并非全在我哋手，都要听马主意见，毕竟马系佢哋嘅。个个马主都望赢，当然唔想误于庸手啦。个别骑师冇马骑，原因全喺佢哋身上。若果你骑得又态度专业，就算一两个练马师针对你，仍会有二十个马房睇你噃。若个个都唔畀马你骑，一定系你问题。可能骑功差，可能水准飘忽，可能唔听策骑指示，也可能成日跑错。

问：点解汤普新骑功麻麻，但大把马骑？

答：态度非常好又勤力。畀只马佢骑，事先做足功课，查马背景，不但在港上阵战绩，连到港前每场表现都向练马师报告，老实，觉得佢主动到有点烦。

问：骑师间中被抽秤，边个最擅长解画？

答：昔日的戴胜最犀利，每次都有一个完美剧本，令监场董事冇佢符。另有个别蛊惑骑师，若在某一场有「特别表现」，事先必定预埋被问话，会早早作定故仔点解释。这方面当然老江湖者着数晒，牌仔英文又唔好，「功课」又冇做，当然大大蚀底。