【曾智华专栏】开个实验网台爆硬

一个人平时懒威懒醒，自然多人睇你几时瘀，一旦发生，当然蜂拥窒到你飞起啦！

小弟讲边个？正是我自己，抵死㗎。上周二在本栏公布畀肥女B窒，因成日信埋啲无谓广告，试吓呢，试吓咾，每次花费几百蚊，次次都得个桔，正牌福头。

最近又见网上有只护肤膏狂谷广告，话有去老癦神效，见二百几蚊（平时的多一百几十蚊），扑去连锁药房店买囉。结果，扑咗N次都食白果，显示除广告效力宏大之外，肯定N咁多长者老友面上出斑斑，个个都想搞掂佢。

好啦，终于买到，回家日日搽呀搽，两周之后，有冇效果？零！显示又被老点！

所以，畀肥女B窒「咁都信」？冇得驳。不止，专栏刊出后，大量「幸灾乐祸」等我瘀的各路生张熟李，开心到爆：「你丁友，平日扮晒英明神武，咪又系街边阿叔一个，广告话乜你信乜！」

众多回应的，有一位专做网上频道老友「叻仔R」，灵光一闪，约见面：「碌Sir，倾倾佢，我有个意念，必爆，正是由你及肥女B唱双簧，开个水鱼实验台，好似消委会咁，买晒各类产品真人亲试，然后做第一身报告，睇睇水鱼率有几高。」

R仔并非讲笑，见面时手机下载咗N段广告，包括宣称：抗衰老、减肥、秃头脱发、排毒、壮阳、治夜尿、消除神经痛、降血压尿酸、舒筋活络、补脑长寿、去斑去皱、治三高⋯⋯

哗，唔睇唔知，原来坊间有咁多「神效」产品，全部三两百蚊，食唔坏人，冇效亦冇人会走去投诉的「补充剂」。

你叫我乜都试完踢爆人？咁即打烂人饭碗之余，连传媒行家广告收入都倒米啫，好乞人憎㖞。

其实「补充剂」根本在卖感觉良好，我无谓乜都吞、乜都试去人肉测试嘞。