【曾智華專欄】拜登將收到上帝指示

暑假馬季暫停，冇得貼馬嘞，咁玩乜好呢？唔怕，「我貼故我在」，一於改貼拜登會否退選。

美國歷史上，好似從未見過一位總統候選人陷入如此尷尬地步。本來這段時期，應該是民主黨萬眾一心支持自己代表，製造龐大聲勢，誓要再撼低案底如疊、口沒遮攔、串爆玻璃、毫無風度的共和黨代表「狂牛特」。

喂，仲有幾個月咋，用賽馬術語，已經入咗直路，進入最後四百米了。

但偏偏拜登就是越跑越冇力，好似想「爬」返終點。直接觀感及客觀民調，皆顯示佢將輸畀特朗普。

你係民主黨幕後大佬會點？眼白白將江山送畀個「仇人」？

更弊可能參眾兩院皆兵敗如山倒，所有政治資產一鋪清袋，未來幾年必被「狂牛特」用盡總統特權玩殘。

故此，黨內希望拜登知難而退的聲音越來越烈，尤其是大金主及巨星，例如佐治古尼，都高調勸退，睇走勢，呢個浪潮只會升，不會降。

但面皮一丈厚的拜登仍死頂，唔讓，竟揚言：「只有上帝才可以叫我退選！」

出到上帝？但小弟分析，形勢比人強，總統背後其實有好多「操控者」，只要一發功，唔到你唔走，因你再冇錢選，黨內戰友也可以調轉槍頭「隊」冧你。到時就變蓬頭垢面，好惡睇！須知一旦玩最狠辣的政治手段時，真係乜都做得出㗎。

我睇幕後正在部署邊個頂上，本來若米歇爾肯出戰，會贏，但佢堅拒。

如今民調顯示希拉莉加賀錦麗有一戰實力，時間無多，若換馬，一兩周內必須扑槌。

點可令拜登自動「收工」？簡單，佢全家咁多「痛腳」，幕後只要發功鋪陳利害，佢自然會話：「我收到上帝指示！」

咁就皆大歡喜啦。