【曾智华专栏】大番薯起步维艰

冇得唔服！本栏在去年底透露，马圈某高人直指有只贵价马改坏名，怕且好难Win，当时是12月。

边只？正是当时黎昭升马房的「喜报围家」。

「碌Sir，好邪㗎。三种马好难赢：一、马名低俗难登大雅之堂；二、极端含意或与政治有关；三、谐音有点大吉利是，屡试不爽。例如早年的『的确近』（Danelaw）真系『钉囉』，得个近字，未Win过。又例如『祇是激』，真系激死马主与马迷！呢只『喜报围家』，一听就是『起步维艰』，点Win？」

冇得唔服，结果只马上季输足十一场，马主畀养马费畀到眼凸（黎厩著名贵）。到今季再输九场，由三班六十五分挞到变五班三十四分后，想唔拉仓都难啦，改去贺贤马房。

睇落飞，幕后肯定输到眼坦坦，咁嘅马有四场打到得五倍。至今已出赛二十三场，仲有冇机会赢呢？你话嘞。

另一新马个名也过瘾，名「大番薯」，究竟马主知否大番薯含意系乜？

结果亮相第一场，果然跑到成只大番薯款，一入直路脚软，最后二百米几乎收停。

其实现役马有三只也是改坏名。一只是「整蛊专家」，出三次三次冇影，真大整蛊。第二只是「洛河」，与「落河」谐音，又系一出钉钉，输八个半马位，不知竞赛为何物。仲有一只「加饭」，上辈经常讲：「冇𩠌食饱饭。」不停「加饭」，即系⋯⋯结果只马跑足十二次，仍在「加紧饭」，服未？

今晚专攻研究第八场三班一千米，牌面三只高晒，即「嘉应喝彩」、「年少多好」及「红逸舍」，边只赢都冇得分㗎嘞。

论斗志，当然是伍厩「嘉应喝彩」，今季位置王，出九次一W三Q三P，准到不得了，做胆可也。冷冷哋拖一票「大老挝」啦，上次初出沙田一千米第四名，今次渡江，必冷，可能试出彩虹！