【曾智華專欄】人間有情，一齊大嗌

日日揸車者，必怨香港嚴重唔夠泊車錶位，而停車場也經常爆滿（邊個猛發車牌但又唔批足夠泊車位，以便掠水，你知嗎？），被逼久不久違例泊車。有公德的，盡量唔阻人，抄就抄啦！冇公德者，則會亂咁阻礙交通，呢類車唔止應該抄，應該拖！

小弟也是駕駛者，當然了解一切，正是食得鹹魚抵得渴，違泊就預咗食牛肉乾。每次皆懶幽默在此「報告」——嘩，又為庫房作出貢獻啦，良好市民啊！因自知抵抄。

不過，一旦文章上載社交平台，則必引來幾種反應。極端的一種，學足某紀律部隊大Sir口吻：「犯法就是犯法，必須執法！」講到好似用法律手段就可解決一切「人/官為」交通問題。理想情況真的應該如此？

記得N年前有位擅講「人話」、極具民望的高官，論及執法者行使權力，語重心長：「公職人員行使權力，必須顧及法理情，若只懂硬執法，一定惹來反彈！應該顧及當時的環境，以情理兼備作考慮。」

鬼唔知抄牌可以一日抄足二十四小時咩，點解警方冇咁做？正正是顧及了法理情。若吓吓抱著「有法我大晒，冇人情講」的心態用公權，只會令社會雞犬不寧。

老友，我昨朝又幾乎中招啦。早晨九點買餸，泊低車在土瓜灣下鄉道街邊，揀菜之際，犀利，突然萬眾齊心，間間舖的東主及夥計彈出門外狂叫：「抄牌呀、抄牌呀！」

點解佢哋冇似「有法必執」一族的諗法——鬼叫你違例泊車咩，你死你事啦！正因大家覺得法律不外人情，唔阻街，買斤菜啫，使唔使去到咁盡，令人唔見三百二十元？

冇乜絕對啱唔啱，但想社會和諧，人人處事應有分寸，而執法也要有尺寸，就咁簡單。