【曾智华专栏】人间有情，一齐大嗌

日日揸车者，必怨香港严重唔够泊车表位，而停车场也经常爆满（边个猛发车牌但又唔批足够泊车位，以便掠水，你知吗？），被逼久不久违例泊车。有公德的，尽量唔阻人，抄就抄啦！冇公德者，则会乱咁阻碍交通，呢类车唔止应该抄，应该拖！

小弟也是驾驶者，当然了解一切，正是食得咸鱼抵得渴，违泊就预咗食牛肉干。每次皆懒幽默在此「报告」——哗，又为库房作出贡献啦，良好市民啊！因自知抵抄。

不过，一旦文章上载社交平台，则必引来几种反应。极端的一种，学足某纪律部队大Sir口吻：「犯法就是犯法，必须执法！」讲到好似用法律手段就可解决一切「人/官为」交通问题。理想情况真的应该如此？

记得N年前有位擅讲「人话」、极具民望的高官，论及执法者行使权力，语重心长：「公职人员行使权力，必须顾及法理情，若只懂硬执法，一定惹来反弹！应该顾及当时的环境，以情理兼备作考虑。」

鬼唔知抄牌可以一日抄足二十四小时咩，点解警方冇咁做？正正是顾及了法理情。若吓吓抱着「有法我大晒，冇人情讲」的心态用公权，只会令社会鸡犬不宁。

老友，我昨朝又几乎中招啦。早晨九点买𩠌，泊低车在土瓜湾下乡道街边，拣菜之际，犀利，突然万众齐心，间间舖的东主及伙计弹出门外狂叫：「抄牌呀、抄牌呀！」

点解佢哋冇似「有法必执」一族的谂法——鬼叫你违例泊车咩，你死你事啦！正因大家觉得法律不外人情，唔阻街，买斤菜啫，使唔使去到咁尽，令人唔见三百二十元？

冇乜绝对啱唔啱，但想社会和谐，人人处事应有分寸，而执法也要有尺寸，就咁简单。