【曾智華專欄】下位新練馬師：潘頓

香港練馬師牌，有人話係「金礦」，真唔真？你有料就絕對真！大家請翻查大摩未退休前幾咁發，真係發過豬頭炳！贏的總獎金億億聲，季季分過千萬元等閒事，因練馬師得獎金中的9.2%，老友，仲未計其他「下欄收入」。

睇睇今季，有六位練馬師總獎金已突破一億元，包括：伍鵬志、呂健威、姚本輝、告東尼、沈集成及蔡約翰，意即全部今季收入將過千萬元。

騎師又如何？若勝出，可分一成獎金；若跑第二至第五，則有獎金的5%。

冠軍騎師當然豬籠入水，上季潘頓就收二千四百幾萬元（未計「下欄收入」）！

做練馬師冇風險，也毋須五勞七傷，好的更可做到七十歲。騎師？一次墮馬分分鐘玩完，好彩醫返好，也可能似告東尼咁，成身螺絲釘！正常情況，騎師未到四十歲，就多諗定後路。就算你自己唔想退役，你老婆都會逼你咪再搵命博！

「軟硬鞭」潘頓正是去到呢個十字路口，四十一歲，周身傷，自知鞍上生涯時日無多，點搞？問老婆！老婆Nicole極喜歡香港生活，故積極游說潘頓改任練馬師，似告東尼及韋達咁，以冠軍騎師身份走「捷徑」求牌。

香港練馬師，一係由幕後一級級捱上，一係早成外地名牌，被馬會挖角，第三類就是由冠軍騎師跳級唔使捱，一嘢就變練馬師。

潘頓如今放聲氣，相信馬會必虛位以待，好快就會棄鞭從練㗎啦！

本周又跑周末，仲要三日跑兩次，有乜天大理由要咁安排法？難明。

今日三班千二米肯定激烈，因「旭日昇」、「營造組裝」、「維港激流」、「魯班精神」及「同祥和順」有力W。你可二重彩複式穿勻。選W，我傾向「同祥和順」，廖康銘下季鎮倉之寶也！