【曾智华专栏】女长者游贵州大困扰

港人北上消费，最多的当然涌往深圳，事实那里已是个百分百先进大城市，有齐卫生设备，种种设施可能比香港更好。

但中国之大，仍有不少地方十分落后，就算旅游区，要搞建设，要搞卫生，要扭转农村文化，仍需一段长时间。

例如贵州，山明水秀，有世界级大瀑布及超级科技设备「天眼」，故引得极多国内国外游客涌到。但其他配套呢？交通？酒店？卫生？饮食⋯⋯

基于不少景点在山区，咁就弊，除地势上上落落，加上当地几乎天天下雨，路面极湿滑外，大部分餐馆宾馆皆仍非常乡镇化，即粗枝大叶，事事不多讲究，包括卫生。

小弟同团有几位女长者，其中之一行动不便，双脚冇力，只能勉强揸枴杖慢慢行。

结果第一日已经皱晒眉头，唔知点搞。

乜事？正是郊野餐馆几乎一律踎厕，我哋用午餐的一间，当然如是。

长者入完洗手间出来，愁容满面，成个惨惨猪样，无他，因从来未用过踎厕，兼且双脚完全冇力踎低，点搞？连经验丰富的导游也企咗喺度，硬晒軚。

一众七嘴八舌，问有冇成人纸尿片卖（附近山区啊）？有冇成人「便盘」卖？附近有冇公共「残厕」？问完N个无法解答问题，最终极决定，导游到附近逐间餐馆睇睇可有座厕，然后扶长者去。

结果⋯⋯在百多米多的另一间餐馆揾到嘞，于是扶住长者一步一拐，极辛苦才去到。

之后，即时转所有沿途安排，要肯定有座厕才去。冇又点？试过几次山上景点冇座厕，只得山脚出发点有，咁，好，就由我陪长者等啦，反正小弟可以去到边写到边，兼且对睇景点兴趣不大，因觉睇Video角度更正！