【曾智華專欄】慢慢查，慢慢追

師傅教落：你可以欠任何人錢，但千祈咪欠政府錢，因隨時追到你天腳底兼搞到你踎監！

入籍美國或加拿大的港人非常清楚，當地報稅制度嚴謹細緻，做任何生意或打工，必須實報及交正稅，否則⋯⋯否則乜？你睇如今美國前總統特朗普及現任總統拜登個仔，變成一身蟻！

捉逃稅，可以追返你N咁多年，問你死未？

中國又如何？1992年鄧小平南巡，批下指示——不理白貓黑貓，捉到老鼠就是好貓。意即我唔理你點搞，總之就要搞起中國經濟，手法隨便用。

此「旨」一落，有目共睹，真真犀利，各省各市各城各鄉無不大搞。各式招商及「經濟活動」如雨後春筍，可以不理任何規章，包括環保、勞工、保險、防火⋯⋯當然，稅務更是側側膊，好多錢出出入入都冇記錄。立時間，枱面錢嘭嘭聲增長，枱底錢當然更不計其數，貪污行賄，成行成市。

怎可一世如此？到某時候，政策排隊出籠，事事開始要跟國策、跟規矩、跟標準。

但貪開的、逃開稅的，點會收手？

所以，先嚟打貪。過去十年，拉貪官拉到上中央，但貪污仍繼續，因再重刑也未能消滅負面人性。

近年國家經濟下行，最方便替庫房「引水」的，正是「補稅」。你以為可以走得甩？當政府嚟真時，由地方政府開始，一步步查，一步步追。

近期內地營商朋友皆知，各地最新做法，是成立「警稅合成作戰中心」，即警隊與稅務部門聯手打擊涉稅犯罪，追得幾多就幾多。

由個個唔認真交稅的慣性形勢，變為唔交回N年逃稅即坐監，怎不草木皆兵？

這個，長遠看，非常健康。因任何先進國家，必強調：精準監管、精確執法及打擊逃稅。