【曾智華專欄】九七前好多「奸警察」

昨天提及非常成功的商業大導演邱禮濤，出道幾十年，拍出八十多部片，亦捧出影帝黃秋生（1993年《八仙飯店之人肉叉燒包》），而佢自己近年亦兩創港產片在內地的最高票房紀錄（2019年《掃毒2天地對決》及2020年《拆彈專家2》），故此，早成製片商的寵兒，要錢有錢，要大卡士也絕冇問題，加上佢拍片著名快靚正，所以，非常搶手，一年可以開四部戲（相對其他餐搵餐食的清貧而有才華導演，真真極度「貧富懸殊」）。

不過，最大可惜，邱禮濤作品仍未有一部可以畀行家公認為金像獎「最佳影片」，而佢亦從未成為「最佳導演」（雖曾被提名）。

公平嗎？我覺得公平，因作品未到金像獎境界，再橫掃票房，也不能夾硬來。

終於，下年有機會一嘗所願了。因為今期上畫的《談判專家》真的精彩，劇力萬鈞，製作方面，瓣瓣高水準；演員方面，兩主角皆影帝級，劉青雲及吳鎮宇演出，再次令觀眾眼前一亮。加加埋埋，就顯出導演的駕馭功力及用鏡頭說故事的段數。

《談判專家》乃重拍二十六年前非常叫座的荷里活片《冇數講》。當年小弟坐在戲院，也覺此片非常震撼，全程手心冒汗，極度緊湊。兩大主角森姆積遜與奇雲史柏斯，亦因此片而爆紅。

好了，珠玉在前，重拍如此重量級電影，會否相形見絀？

話你知，絕對冇！論演技，劉青雲及吳鎮宇真係冇得輸。此片睇得出，邱禮濤比過去幾年拍的每一部作品，更加用心，尤其處理角色衝突方面，顯出「最佳導演」功力了。

岔開一筆，此片極度「政治正確」，因發生的年份在過渡前，其時不少警察仍是「奸」的！好戲，火速入場！