【曾智華專欄】搵人唔知「米價」

童年時經常聽見長輩窒人或罵人：「你呀，正一食米唔知米價！」

從來冇人真真正正解釋小弟知這句話的含意，但我也畀人鬧得多，開始意會其比喻，正是：每天吃米飯，卻不知道米的價錢。用來形容一個人對周遭事物完全不了解，非常無知。

今日突然諗起呢句，因為⋯⋯先唔講自己，講講睇到一個過癮訪問，主角為八十五歲的作曲及演唱巨星Neil Sedaka，向記者展示其新裝修的豪華大宅。

年紀老，當然唔會再住House，未煩過咩。於是買下幾間豪華單位打通，大到飛起，露台景觀一望無際，用來享受人生最後一段快樂日子。訪問尾段，記者問Neil：「仲有冇興趣作曲呢？」

其實若你真的認識佢，應知所有Neil Sedaka的經典金曲，皆是在上世紀五十、六十年代作下的，例如：《One Way Ticket》、《Breaking Up Is Hard To Do》、《Oh Carol》、《Happy Birthday Sweet Sixteen》、《Laughter In The Rain》⋯⋯單單食呢堆歌的版稅，已肯定幾世無憂。再者，任何創作者的靈感，高潮期多只在二十多三十歲，通常四十歲就完結。所以，就算Neil再作曲，相信也難以流行。

不過，以佢聲名，若表示有興趣作曲，必仍大把人肯畀錢。訪問到此，佢突然笑笑口講：「最近阿女畀張支票我睇，話有人邀請作曲，支票銀碼為四千六百美元。我一睇，話畀阿女聽，呢丁友好似填少咗個零喎！」

事實，我亦經常遇上搵人唔知「米價」者，從冇做好資料蒐集，就烏卜卜出價邀請。喂，你堂堂大集團，每年盈利十億百億計，如此「肥到著唔到襪」，請嘉賓演講，好意思扮窮，要求我收NGO車馬費？係咪儍咗？

呢類人，送首《Lemon Tree》畀佢先：「Lemon tree, very pretty…but the fruit of poor lemon is impossible to eat.」抵佢哋日日食檸檬也。