曾智華-專欄
2024-05-21 10:55:39
【曾智華專欄】若梁朝偉都做得到⋯⋯
藝人,一如任何圈子的人,有好多種,今日只講情操高尚的。
上世紀九十年代初某個凌晨,香港仔隧道發生嚴重車禍,一位被譽為明日之星的天才騎師林嘉成撞車,重傷昏迷,急送瑪麗醫院搶救。
翌日遇上佢師傅、前練馬師伍碧權(今天前領練馬師伍鵬志父親),神色凝重作出懇求:「碌Sir,成仔未能甦醒,醫生話若有佢喜歡的聲音刺激,可能有幫助。成仔偶像係郭富城,你可否請佢來探探成仔?」
舉手之勞,立即聯絡。
答曰:「非常樂意,但絕對不可曝光,以免外間以為用此作宣傳。」
於是,就在入夜與凌晨之間靜靜進入病房,郭富城用輕輕的聲線在林嘉成耳邊唱了兩首歌,不幸地,仍無法將佢喚醒。
這個畫面,只得我和車淑梅得見,衷心欣賞郭富城三十年前已有這種情操及智慧。
今日再講第二位,應屆影帝梁朝偉。最近睇到一張海報,咦,似乎偉仔絕少做政府公益活動代言人的,為乜突然高調出現,並且以誠意表情講咗句:「如果連我都做得到,你哋都一定可以!」
偉仔正為「兒科醫學會鵬程奮進堅毅獎學金」作推廣。
此獎學金由大群充滿愛心的兒科醫生組成,目標希望協助不幸家庭長大又或患病的兒童,能夠健康快樂地成長。
去年第一屆周年晚宴,請得梁朝偉做嘉賓,起初以為佢做完儀式即離開,豈料竟默默地坐足三小時,擺明有所觸動。
原來偉仔自己正是來自破碎家庭,十五歲輟學,如此先天不幸也能捱出頭。
今年佢決定捐出三百萬元,鼓勵所有輸在起跑線的「前自己」努力奮鬥。
此事未有人爆過,就由我公開啦。