曾智華-專欄
2024-05-21 10:50:31
【曾智華專欄】假如李小龍仍然在世
娛樂圈一如球壇,乃英雄地,人人崇拜的,是最當時得令又狀態巔峰的偶像。所以,這一行最是現實,百分百——不許人間見白頭。
年來聽過N咁多曾栽培出不少巨星的智者,酒後(清醒時唔方便講明)話:「明星,最理想是在最光閃閃時消失,如此才會被永恆懷念。」
中唔中?你話呢?當然中到開巷!
昨日在網台睇到昔日的武打巨星陳惠敏接受訪問,八十歲了,早前患腦癌,在屋企樓下暈倒,還幸發現得早,細胞剛擴散,立即醫,如今醫學科技及藥物不斷進步,正如佢講——執返條命。
不過,年紀大機器壞,跟着是行唔到,因兩腿髖關節已嚴重磨損,再不能支撐身體,於是又要施大手術換金屬骹,所以,目前需要持枴杖走路。
一邊睇,小弟一邊諗起上世紀七十年代的陳惠敏——著名打仔,縱橫尖沙咀,日日開片。真㗎,不單止用拳頭,兼出刀幾十人互劈的一種。
「嗰時,絕對先要打出名堂,才會有老細畀場你睇,百幾二百條𡃁跟我,個個要搵食㗎!」打呀打,結果周身傷,左臂更曾被劏開。
陳惠敏江湖個「朵」甚響,最威猛時,影圈形容「陳惠敏的拳、李小龍的腿」。佢曾學習西洋拳,有天分,出拳快而重,加上滿是紋身,故在江湖中有不少崇拜者,兼且為人有義氣,也樂於幫人,包括被欺負的藝人。
「八十年代電影雖屬黃金期,但不少賤人老闆搵藝人拍戲,畀完上期就唔找尾期,個別求我出頭。唉,真無良,咁都恰?於是我踩去搵片主講:『你唔找數,我當你欠貴利,一定搞你!』就此,個個投降!」
睇睇老去的陳惠敏,再諗諗李小龍,若果佢在世,已八十四歲,還能打得甚或行得嗎?