【曾智華專欄】不用水晶球也能預知

從事傳媒工作近半世紀，退休前天天在電台節目分析這、分析那，退休十年了，也在報章及網上「口多多」，乜都分析一餐。

其實世事重複又重複，根本跳不出歷史軌跡，故此絕大部分問題，只需用常識（Common Sense），已可推斷將會如何發展。

舉例，有晒白紙黑字紀錄，小弟在本報凡周一附送的《投資王》，有個專欄名《智豬在握》，每期分析一個財經現象，全部皆以個人的經驗及看到的數據作判斷。

舉例，2017年，當時未有社會運動、未有疫情、未有高息，我已多次大聲作出警告：一、切勿買樓投資，因不單止無利可圖，更會蝕大本！二、賣樓要快，買樓等等；三、沽樓要大力劈價，買樓則狠心還價⋯⋯

因為樓市由2003年的平均二千六百元一方呎起步，似火箭般升到近萬七元一方呎，簡直癲咗。期間打工仔人工只加了兩、三成，點供？根本嚴重脫節！奇在當時並沒有「樓市評論員」（多有利益衝突）作出大冧的預警，令我變了一士諤諤。

結果？近兩三年發生的，唔使我講了。

另一件大事也是不用水晶球，也能預知其難以「收科」的，正是垃圾徵費。

同樣有白紙黑字紀錄，小弟去年在本欄分析，垃圾徵費根本完全未Ready，由市民接受程度到所有配套皆未成熟，若硬闖必定變一鑊粥。最弊領頭人謝展寰完全唔夠班（AQ、EQ及IQ）做局長，場仗一定輸！終於政府果然孭到應，無奈公布拖至8月。

本欄也斷言——8月仍會一鑊泡，必定唔掂！

睇走勢，好衰唔衰又中，政務司副司長卓永興明言：「初步問題多，條件成熟才推。」即係釘釘。

我再預測多一單，謝局長鞠躬下台日子，不遠了。