曾智華-專欄
2024-04-24 16:42:04
【曾智華專欄】伍鵬志被追到氣咳
今個馬季,冠軍騎師根本冇得鬥,由「軟硬鞭」潘頓隻手遮天,無他,騎功佢高晒,好馬佢霸晒,絕對打橫行,巴閉到「去唔去你都吹佢唔脹」境界。上周六又表演,話之馬迷問候佢祖宗十八代!
不過,冠軍練馬師之爭則越來越白熱化,因已入直路而勝負仍難料。
小弟早指出,雖然伍鵬志季初放紙鳶,希望以「大逃」放甩對手,有冇咁順攤?冇!因一睇馬房陣容,伍廄可用的馬已W得七七八八,但新兵源質素輸呂健威及蔡約翰半班,尤其呂健威,有十幾隻冚手新馬未用,一撳掣即可能大爆發。
伍鵬志心急,所以次次都狂報名。呢呢,今晚又正副選場場報,擺明殺得幾多殺幾多。究竟佢領先優勢能否捱到季尾?我預測——No!今屆冠軍應是呂健威。馬季仍有不足三個月,答案好快揭盅。
今晚賽事,研究第二班一千米短途,由最高分講起。
「狀元及第」(100分),前季亮相,乃快活谷千米之星,三W。但上季中開始轉型,告東尼改為安排佢跑沙田一千米。今季交出一W後,已升到102分,要坐馬監嘞。
「韋小寶」(99分),近況甚差,又非一千馬。
「緊張大師」(99分),前季快活谷一千米極出色,上季落腳轉慢,改跑沙田。上月在沙田一千米偷咗一W,又係要坐馬監。
「四季醒」(94分),季初此程一W後,已久沒表現,狀態低沉,唔要。
「電氣騎士」(91分),今場回跑特擅途程,必須尊重。
「當家精神」(86分),頂多P,邊線。
「人和家興」(84分),上仗W完加八分,有排減分。
「雪勇神駒」(83分),唔使睇。
「財才」(80分),最低分,但今季同程兩W兩Q一P,全入三名,必須尊重。
「財才」、「電氣騎士」及「當家精神」互串。