【曾智华专栏】沙田应即搞夜马缤纷

马迷若有入场的，应知跑沙田与跑快活谷，完全两种感觉。
　　
沙田若冇大赛，例必冷冷清清疏疏落落，尤其大寒或大暑，除沙圈永远热闹外，大大个场，经常人气不足。
　　
快活谷完全唔同，地方细，近市区，再加上有啤酒园及现场乐队，在每场之间，成功炒热气氛，真真正正有「国际快乐融/熔炉」之感。
　　
究竟快活谷的模式，能否移到沙田呢？有人当然立即「负能量」：「边得吖，沙田咁鬼大，点似快活谷逼逼贡咁过瘾㖞。兼且长途跋涉，肯定冇乜得搞！」
　　
系真唔系真？唔试，永远坐喺度「享受失败」。试又不断改良，正是五十五十，有可能闯出彩虹。
　　
小弟认为，趁沙田黄昏马即将开波，一于大搞特搞，试试佢。
　　
首先确定一个点做啤酒园，开始搞时，除有Live Band，更可以免费任饮（或五折啦），吸引华洋啤酒客。然后每次赛马搞主题之夜，例如次次定不同服饰，今次空姐空少，下次Cosplay。马会大把钱，掟三几百万元出嚟谷，搞到非马迷都涌入场「睇嘢」，即掂！
　　
纸短情长，总之唔搞就乜都失败，搞，就有机会黄昏马「杀出个黄昏」。小弟免费送「桥」。
　　
今日沙田跑泥草，冇乜高潮，决定研究三班泥地千二米赛事。
　　
首先飞起「好好心得」，绝非此程马。第二飞为「福国宝」，冇根冇据，出来博减分。第三飞为「花果猴王」，上赛跑尽赢短头，用力不少，加五分，要唞一唞。第四飞「明心知遇」，非泥地马。第五飞「闪电」，季初赢两场谷草后，谢晒。
　　
死！咁咪剩返「升泷驹」、「凯旋时光」、「时时满意」及「怡劲力」？一再翻睇巡逻影片，肯定头两驹高晒，正路跑，其他只能食泥㖞。一于二重彩指定位置，头两只做复式胆啦。