【曾智华专栏】冠军练马师必有恶斗

上周日TVB杯，小弟赛前在本栏将曾志伟大名曝光，立时畀贴士有压力！幸不辱命中二重彩，较冷的「增有」行头，都几好分！
　　
跑马，除睇每场比并外，也睇骑练在「大长途」中的较量。
　　
长期以来，香港骑师榜根本冇得斗，尤其莫雷拉离开后，潘顿绝对可以「只手遮天」。因骑功高，自然垄断最好的马，大量子弹任佢拣，二十一个马房，基本只有方嘉柏与佢冇交易（背后当然有故事），根本冇骑师赢马场数能接近佢。
　　
今季又系呢条「软硬鞭」玩晒，骑师圈势力严重失衡。
　　
不过，练马师榜则不同，多位现役的皆曾做过冠军，今季争持尤为激烈！
　　
以马论人，伍鹏志朝气冲天，出闸狂放，未转入直路，已弹离对手十多个马位。人人问：「哗哗，今铺边有得追呀？」
　　
系真唔系真？我话唔系！全季比并是大长途，鹏仔将现役马用尽后，就要研究佢仲有几多子弹跟尾。每个马房论实力，一定要睇新马数量，因旧马一过五岁，再进步机会甚微，大马房必将估计再冇W的马扫走，用空位入新货。呢方面蔡约翰着数晒，旗下马主大把水，马贩将最优质货预留畀佢，又外地有牧场帮手预先训练，对手根本冇得同佢炼。蔡神仙马房之内，未上过阵或未用尽的新马有二十多匹，全部皆中高班质素，大部分可贡献一至三W。
　　
反观伍鹏志只得十六匹新马，质素略略低，W机会未必肯定。
　　
总的睇，2月底开始，当蔡约翰一揿掣，战绩就会爆上，先赶过吕健威，然后⋯⋯我买佢将杀低埋伍鹏志嘞！睇睇中唔中？
　　
今晚研究第四场一班千二米。提供「顺势而飞」、「精灵勇士」及「魅力宝驹」，W、Q、PQ及二重彩啦！