曾智華-專欄
2024-02-16 10:44:48
【曾智華專欄】金鑽貴人與金鎗六十
新春與馬友團拜,論馬事,當然集中講兩匹馬王及兩位騎師。兩匹馬正是短、長途馬王「金鑽貴人」及「金鎗六十」,騎師則是潘頓及何澤堯,因兩匹恍似兩位的私家馬,單單贏得的獎金已幾百萬元至千萬元計。
「金鑽貴人」贏十五場,當中十一場由潘頓經手,如今總獎金七千萬元,意即「軟硬鞭」在此馬身上,已執幾百萬元!
「金鎗六十」又如何?更犀飛利,出賽三十場,勝出二十六場,簡直神馬,總獎金一億六千五百多萬元,何澤堯在此馬身上分得的,也是天文數字的過千萬元!
世間一切,總會有完結的一天。
首先講「金鑽貴人」,1月28日國際一級賽事,一點三倍賠率,全港(球?)馬迷瞓身。當然,如此賠率,幕後也已瞓身。
結果,開啊!大家可重複翻睇呢場「軟硬鞭」的「表演」,尤其入直路後的走位、推騎及爭勝決心,喂喂,乜呢個係潘頓咩?小弟有此疑問,當然任何「精明眼」也有此疑問。個個輸到噴血,幕後冇得威威外,更慘失天文數字獎金,馬主及練馬師必被親朋戚友甚至同業笑到面黃。喂,全球排名最高的短途馬王,竟可以跑成咁?
唔嬲到爆炸就唔係正常人啦。結果你做初一,我做十五,立即宣布以後換人,場戲可能未完!
「金鎗六十」又如何?八歲了,愛馬之人必不會逼佢跑到無力再戰而輸。據聞部署今季引退,一切等宣布啦。
以何澤堯騎功,冇咗「金鎗六十」,收入當然冇咗過半,但也是必須面對的現實!
研究明天TVB盃!無記總經理曾志偉乃本欄擁𧄌,希望今日小弟貼士幫到佢W!
二重彩五隻複式,「巴閉哥」、「朗朗乾坤」、「增有」、「紅愛舍」及「晶晶日上」!