【曾智華專欄】影帝自我艱苦磨練

任何行業的成功人物，登頂前必定經過非常漫長又艱苦的磨練，外人絕難了解及體會整個過程。
　　
即如近日被噓爆的球王美斯，以及其長年「拍跳」對手C朗，過去二十多年的自我磨練，相當有苦行僧味道。
　　
球員在黃金時期，恍似美元如雨從天灑下。此時損友必蜂擁埋身，若不懂自制，極易酒色財氣，甚至毒品一齊來。
　　
尤其講浪漫的巴西球員，會極速變壞，浸淫逸樂，足球壽命短暫。
　　
近半年小弟迷上台灣影帝吳慷仁，覺得這位靚仔演員演技絕對令人驚艷。
　　
速速查其背景，童年時並不幸福，父母離異，小小年紀已要邊讀書邊工作幫補家計。做過小販、地盤雜工、餐廳侍應⋯⋯等。學業方面，沒機會入名校或大學，只在職業學校就讀，一切平平庸庸。
　　
正是這種背景，吳慷仁有機會體驗社會上不同小人物的辛酸。而艱苦的童年，更不知不覺磨練出過人吃苦的能耐，深知一切不會由僥倖而來，事事必須由底層建立。
　　
大家若睇過《富都青年》，已知佢可以為演好一個角色，作出幾大犧牲。
　　
最近有機會欣賞尚未正式上畫的另一套吳慷仁奪得影帝之作《但願人長久》，又再眼前一亮。佢扮演一個吸毒失控父親，百分百入戲，似足大家常見在深水埗天橋底出沒的道友。
　　
點解可以似成咁？此片導演祝紫嫣與我分享：「碌Sir，我第一次執導長片，有幸遇上慷仁，眼界大開。佢竟在開拍前一個月靜靜來了香港，每日到美沙酮中心門口及深水埗露宿者聚腳處觀察，日日模仿佢哋的面容體態習慣衣著，以至行路姿勢⋯⋯這種專業毅力，罕見！」