曾智華-專欄
2023-11-30 11:42:26
【曾智华专栏】跟住碌Sir去睇戏
人生其实不用太多刻意规划,反正你想的未必得到,你未想过的,有可能无端白事弹出,一切恍似早有剧本。
例如小弟读中学时,家父当然想我读理科,然后做医生或工程师。
不过冇天分就是冇天分,物理、化学统统考试肥佬,点搞?冇得唔投降。转读文科?又是一窍不通,睇见本书只想瞌眼瞓,又唔掂。
终于误打误撞走咗去美国读四流大学,咦⋯⋯乜有科叫做Speech,唔使考笔试,斋噏已掂,如此才发觉自己有「噏嘢天分」。
终于「噏出彩虹」(当然要有脑!),靠在电台开咪养妻活儿、供楼买车,兼得到少少江湖地位。
一切有冇刻意规划?冇!
好嘞,三十多岁开始学人投资,结果蚀到血迹斑斑。终于五十岁才开始认真钻研金融世界的蛊惑,学懂趋吉避凶,终在六十岁前获得财务自由,安稳过著冇经济问题的退休生活。
又再误打误撞,被封「退休专家」及「投资达人」(故有N个骗子利用我名字招摇撞骗),一切又系绝冇刻意规划,撞出来。
另外,众所周知小弟为食成性,并有多个「为食小组」,晚晚出外觅食。食吓食吓,又食出个乜乜物物食家身份。其实全部冇乜研究,纯揾到好食的,就公诸同好。
退休后,时间多咗,又自由,可以个个星期睇两三套电影。如此,一年就是百多套。搞搞吓,又变「电影精」,推介的电影,累积不少追随者,凡我推荐就入场。
基于有专栏,又有社交平台,加埋十几万读者粉丝,慢慢又累积到影响力。
昨晚有位影坛中人认真提议:「碌Sir,你可否搞个『跟住碌Sir去睇戏』的群组呢?话唔定可帮到本地艰苦的电影业㗎!」大家认为有冇得谂?