曾智華-專欄
2023-11-27 10:48:51
【曾智華專欄】十月芥菜果然超正
童年時經常拉長輩衫尾(買少張飛,坐膝頭)入場睇粵語長片,不時聽到一句形容詞,多出自陶三姑、高佬泉或鄧寄塵一類老薑的口,對象永遠是情竇初開少女,這句話正是:「你呀,正十月芥菜!」講時有少少嘲諷口吻。
而受的少女,多數含情脈脈低頭微笑接受。
時至今日此形容詞當然Out到爆,不過,也可介紹一下。「十月芥菜」是指農曆十月時份,芥菜陸續長出花心,正所謂「起晒心」,比喻少女情竇初開,通常有了一個心儀對象,但又不敢或不懂直接表達。這個與早年社會風氣較保守有關,若女性吓吓主動,會被人視作⋯⋯
好嘞,形容詞點解,我早早知,但真真正正十月芥菜有乜咁巴閉,直至早兩晚才知。
老友貞姐跳槽鯉魚門「豪門」海鮮,力邀捧場。好,做朋友應適時出手。於是拉大隊殺入去,之前聲明——唔正唔食!
菜單早早傳來:豉汁炒花蛤王、白灼生猛象拔蚌、上湯龍蝦伊麵底、清蒸野生東星斑、游水大墨魚刺身、椒鹽巨型瀨尿蝦、油焗爆膏奄仔、十月芥菜膽新鮮雞、上湯浸時菜、瑤柱蛋白炒飯。
歎完一餐,無得唔服,全港最頂級質素的海鮮,仍是在鯉魚門,就算貴多少也無話可說。出嚟覓食,尤其是海鮮,真要不惜腰間錢!
今晚最失驚無神令人驚喜的,為十月芥菜膽新鮮雞。雞食得多,幾新鮮、幾嫩滑都年年得嘗,尤其香港有農場飼養。
但十月芥菜膽,原來可以肥美爽口到癲!
速速查點解?明白晒!農曆十月,立冬過後就有「冬芥菜」上市,不帶苦澀又冇渣,水分充足,入口爽甜。你想試,自己WhatsApp貞姐問可也:6136 8521,話碌Sir粉絲,應該掂!