曾智華-專欄
2023-11-23 15:49:32
【曾智華專欄】旅遊發展局快做嘢
香港政府最高指示,谷旅遊,大力谷,谷谷谷,等遊客知道Hong Kong Is Back及Hello Hong Kong。
指示已落,但層層工作分配到位未呢?效果又見到幾多呢?遊客又是否覺得一切已變User Friendly呢?小弟冇整體研究,不便作全面評論!
不全面評論不等於無可評論!
今日就想指出一個「荒謬現象」,覺得旅遊發展局、負責鯉魚門區的政府部門,以至區議會及商戶聯會,都應打屁股十八大板!因明明有隻金雞吸引遊客,但就搞到烏燈黑火拍晒烏蠅,全體放軟手腳,有錢都唔識執!
講乜?前晚為支持鯉魚門酒家老友,刻意安排大隊「快樂傳媒老是佛」殺去幫襯。有啲揸車,有啲搭港鐵,而小弟正是港鐵一族。
港鐵油塘站落車,站內指示清晰,A1出口就可行到鯉魚門。不過⋯⋯不過乜?真真慘情,當時六點半,已全面天黑。出咗A1開始,半隻字、半個指示都冇,你話遊客點可在漆黑中行十分鐘到鯉魚門海鮮街?
明明一個具特色旅遊區,可以吸引無數遊客光臨,歎香港最頂級海鮮,點解搞到變趕客?
在毫無路牌及明確指示下,我就似其他遊客,由港鐵站出口開始問,然後在昏暗街頭摸索前進,一邊行,一邊心中有氣,點解鯉魚門商戶、政府部門(當然包括旅遊發展局)及區議會,竟然路標都唔整個,完全唔係波!
終於入到酒家,老闆當然苦水滿肚:「唉,碌Sir,生意難做呀,拍晒烏蠅呀!」
當晚的海鮮,樣樣非常高水準,一切如舊日的美味。但整個鯉魚門就是冇當客人是客人,不懂得提供基本便利與吸引。
唔該楊潤雄局長化身遊客體驗一下,再自己問責,究竟做過乜呢吓?