曾智華-專欄
2023-11-22 16:01:23
【曾智華專欄】韋達親操,出擊信號
輸(捐)得錢多,智慧型馬迷一定積累多少經驗,並非靠撞,而是有邏輯、有根據的。
例如小弟多番提及騎師皆有英雄感,尤其在親人面前,更加唔衰得,故請得家人入場或遠道而來探自己,必搏命。
早前霍利時由南非來港探囝囝霍宏聲,阿仔立即贏馬,就是例證。
上周日此現象更連珠炮發。澳洲騎師艾道拿父母專誠來港捧場,嘩!艾仔簡直馬神上身,場場搏甩髀,四W一Q兩第四,一嘢鍊低潘頓,掃下「騎師王」!
另外,潘頓當日也有老婆大人及一對子女亮相,即時出「硬鞭」多過發「軟鞭」,𡁻咗三W一Q兩P一第四,擸咗兩場二級賽冠軍,入凱旋門及領獎時,皆帶埋老婆仔女,呢種「我要威爆錶」心態,你明嗎?似火山爆發㗎!
當日還有另一例子,賀賢美麗太太抱着出生不久的BB入場,就咁,第一場就勝出「福星」。
不過,奇在小弟次次捧場的《賽馬日在線》密探「零零亨」,並冇高調品題!
當日小弟中咗條熱頭冷腳二重彩,乃第三場大熱「精算暴雪」搭十六倍的「龍城強將」。後者閘前完全冇飛,但我決定以佢做複式膽!
點解?又係累積經驗。韋達凡郁手,多會親自仄準出賽馬,不是一次,而是兩、三,甚至四次。「龍城強將」佢竟然十日內親操三次,意向非常明顯也!呢場大家可翻睇片,若非「龍城強將」曾受阻一抽,根本跑第一與第二的應對調!
今晚又如何?有隻應會冷的韋達寶藏——「龍的風采」,上次千二米入Q,隔大半月再出,仍配楊明綸,但排十一檔,應燒都唔熱。晨操韋達親試一課,一於用佢拖「實力哥」、「精選威」及「高份數」Q及PQ,再複式二重彩!