曾智華-專欄
2023-11-17 12:42:43
【曾智华专栏】乡下仔骑师多无知
今年5月骑师波健士及苏兆辉出事,前者因投注赛事,违反诚信被钉牌十二个月,后者也违反同一规例,被取消出赛资格十个月。两者所犯的非常严重,能再回港策骑机会不高了。
事件发生后,有极资深退休马会高层对我讲:「碌Sir,好多外国骑师其实是单纯乡下仔,年纪又轻,又不知世途险恶,尤其对香港马会保安部的神通广大更成嚿云咁,点会唔中招?」
睇返班德礼个案,真真感到佢儍吓儍吓,畀人𠱁咗入局都完全不知其严重性。
罪名第一条,摆明有人利用佢攞料,连「独家用」手提电话都提供埋,有少少分析能力的都应知,即要避免畀人偷听,故鬼鬼祟祟另作安排啦。
第二项更攞大命,竟同意接受一名人士的款项,而该名人士并非其曾策骑出赛马的提名人。即系点?即系「收外人水」!
骑师「收水」后,当然要执行「畀水」者的指示,难道有人无缘无故胡乱派钱畀你咩?
究竟畀水者要求班德礼做乜,马会一定知,不过,证据可能留返日后用。幸而今次班德礼并冇真正收下指控中的金钱,否则监都有得坐!
呢个Case,若我冇估错,肯定仍会发展,因边个安排及提供电话,以及边个提供款项畀班德礼,马会应全盘掌握,日后会否「做嘢」,围内人尤其传媒,当然极度关注。
好嘞,马季进入大赛期嘞,明日先嚟三场二级赛,跑平磅。至此高分实力马将全部归位,难再爆大冷,最多只能热头冷脚。
千二米及一哩赛想收钱?易!分别用「金钻贵人」及「加州星球」做二重彩复式胆全餐啦。起码冲线时有得嗌——上上上!不过,派几多就唔知喇!