曾智華-專欄
2023-11-15 11:49:29
【曾智华专栏】大刘与古仔
上周六早上七点到茶记打趸,揭开本报新闻版,冇乜吸引,改睇娱乐版,劲抢眼!「大刘」刘銮雄开记者招待会,大骂某某「贱人」。我心谂:「使唔使去到咁尽呀?」
大家心照,心智正常者,绝对唔会随便恨一个人,若恨之入骨,之前一定有过非常⋯⋯的经历。所以,大刘咬牙切齿闹的人,茶记内八卦友个个话呼之欲出啦。
早餐完,跟住睇长者早场,选咗《白日之下》。呢套片筹备足足五年,点解?因剧本冇乜商业元素,投资者难揾也。终于又系有劳「古仔」古天乐拔刀相助,才能开拍。
影圈之内,古仔已成大侠,冇人唔服,因佢低调地(甚至冇公开)帮过N部有意义电影顺利诞生,只因想为社会做点事。好人好报,故能够猪笼入水。
《白日之下》,原来有另一笔资金义助,乃「刘銮雄慈善基金」,开场时大大只字打出来,小弟不禁会心微笑。因两个钟头前才见佢狠狠出招踩「贱人」,如今又磅水拍良心社会片,比对相当戏剧性。
《白》片讲乜,个个知。事实,2015年的护老院虐待新闻轰动全城,人人大叫:「哗⋯⋯咁都得?」
真系「得」㗎!我知,因当年家母要入住护老院,我只好不停寻觅,曾参观过不少,在草根区内的,真有很多似片中的不堪入目。
你话嘞,社会福利署会否儍吓儍吓,唔知日日有「惨情」发生?白痴的才会信!不过,片中也有道出原因。现实中,边个有能力用一日、一月,甚至一年,就能将惨况全部改变?冇!一如㓥房、笼屋的存在,全部事出有因。
当然,这绝非「唔做嘢」的借口!冇人会要求政府识变魔术,即时有足够合标准的老人院宿位,但理应有个KPI,有个目标去奋斗啩?