曾智華-專欄
2023-09-15 12:59:59
【曾智華專欄】畀「例湯」淥親
好心有好報,馬會乃香港最大的慈善機構,馬迷乃香港人數最眾多的善長群,年年月月不停捐「輸」,季季納稅幾百億元。真的很神奇,歷史紀錄,天公無論點發脾氣(狂風暴雨),但一到賽馬開波,就即收「火」,變和顏悅色。
過去十日,黃紅黑雨加雷暴齊晒,也如是,開跑就冇問題。例如周三,跑完後,大件事,倒水咁倒,倒到周四早上變紅雨,唔使返學!
周三晚小弟「重傷」!並非因貼的「加州得力」跑第六,我只雞仔注,小事。不過,就畀兩位練馬師的「例湯」淥到起水泡。
圈內皆知,凡賽馬日,各馬房都會發放練馬師貼士,由主席到遴選委員到馬主,人人有份,大家稱之為「例湯」。意即有參考價值,但水準一般。除咗⋯⋯除咗乜?正是練馬師將旗下出賽馬匹排第一位,顯示信心十足。
過往經驗,夠膽擺第一,冇W有P,而事實亦如此。
周三有兩個馬房的「例湯」旗幟鮮明,信心十足,包括沈集成馬房畀「勇威神駒」,羅富全馬房畀「華麗活力」及「英雄豪邁」。結果三隻全部變大熱,分別一點五倍、四倍及兩倍。
冇理由唔跟,於是少少重錘WP過關。結果⋯⋯唉,淥親囉。未算重傷,但已少少損手爛腳。
好!輸完又嚟玩過,寄望在明天!
明天又有一場可以用以下定律——高班讓磅馬少=爆冷。正是第三場二班一千米,只得六匹馬出賽,其中有隻一千米馬王「實現夢想」,出三次,三次彈離贏,明天升二班再擺擂台,肯定熱到焫手。咁就正,在陣有兩隻分分鐘劏佢,包括「當家精神」及「英雄豪傑」,另加一隻「精靈勇士」也可入冷腳,如此,就用以上四隻複式二重彩,再用「當家精神」做複式膽可也。W得!