曾智華-專欄
2023-09-12 10:45:49
【曾智华专栏】搏老命Vs.柔功门
马季第一击,本栏幸不辱命,话明香港最高分短途马王「金钻贵人」必仆,原因写得好清楚,兼且再次应验——高班让磅马少=爆冷。这个「定律」,大家请存记,因为一年总有三两次机会出现这情况,少少哋执返多少可也。
睇潘顿骑马,我再不会激气,反之估佢今次开「搏老命」或「柔功门」,因佢用硬鞭软鞭相当随意,视乎心意想点。
远的不讲,大家想「欣赏」的话,易!立即上马会网重温两场赛事,你就可知「软硬鞭」阵上表现反差可以何其大,视监场董事隐形,因吹佢唔胀、掹佢唔长也。
第四场,当然是睇佢点「输」131分马王「金钻贵人」。六只马跑短途,好明显一出闸已经知佢想点。先好整以暇,冇抢头,守住头马几个身位之后的外边,毫不肉紧,更不积极,就咁,转入直路已肯定输咗半。佢有冇大力推骑落鞭,好似以往跑大赛咁搏命?完全冇。堂堂马王,就咁输两个半马位,死畀你睇,服唔服?
但潘顿转身,可以话都冇咁快!第九场骑「旺旺神驹」,因摆明当日沈集成玩「大过关」,完全唔输得,于是呢场大家又再睇到老潘的「抢钱式」跑法。同一人,一日内变两种级数骑师!
当日最反高潮,「特首杯」特首冇出现,代表都冇。豪雨成灾当然是考虑,但既要搞旺个市拼「XYZ」(乜乜物物),就应出席(闪一闪也可)。跑马乃香港税收/慈善命脉,岂可不鲜明支持?
今晚跑快活谷,这里正是「夜经济」最成功典范,有游客、啤酒、表演、赛马,人人欢乐,如此气氛,才谷得起个市㗎。
今晚提供「加州得力」,上季同程出九次,八次有奖金,六次入前四,准到不得了,个个骑都得,绝对准绳。