【曾智华专栏】马会赞助的准则

周三早上，又夹大叠报纸到地踎茶记叹早餐，听吓班的士大叔做「时事栋笃笑」。
　　
佢哋个个都是马迷，马季唞暑冇本地马赌，真系「囉囉挛」。幸而马会安排咗全个暑假有越洋转播，大家可以食「美沙酮」顶住。
　　
本来8月26日转播最后一次，然后大家要忍到9月10日本地赛事开锣，才可以再「踊跃捐输」。点知马会好似识变魔术咁，「Ma Li Ma Li Hung」，一嘢又变多个海外赛日，正是明天的德国巴登大赛日及法国隆尚磨坊大赛日，真好玩。海外赛，的士大叔识鬼咩，所以冇得研究，投注只是顶住瘾而已。
　　
不过，佢哋当朝讲的，竟然是个高层次问题——马会赞助的准则。
　　
事缘宣传咗两星期、有晒场地卡士，以及特首可能出席献唱的「立会好声音」音乐会，宣布突然收档，唔搞嘞。点解？当然系目前时势搞啲咁嘢，属「政治不正确」，故畀「大势力」劝阻或喝止啦。
　　
班的士大叔对呢个音乐会好有意见，小弟听落又有啲理由。
　　
肥油A ：「喂，高佬，呢单『立会好声音』，唔多妥㖞。」
　　
高佬B：「关你乜事呀，又冇叫你买飞？」
　　
肥油A：「派飞我都唔睇啦，又唔系歌星。不过，你同我场场马捐钱，有份养马会，故此，佢点使钱，就关我哋事嘞！」
　　
高佬B：「乜讲到自己咁巴闭呀？马会使钱有规有矩，行政费外，就是行善，做大董都冇得袋㗎。」
　　
肥油A：「你讲得啱，行善或公益使钱，我冇意见。但个『立会好声音』系乜嚟㗎？整乜鬼要赞助呢班议员柴娃娃自娱呢？况且呢种做法，有巴结政治人物味道，唔系好妥噃！」
　　
高佬B：「咦，系㖞！马会究竟有乜赞助准则的呢？呢单嘢冇理由咁决定㗎㖞？之前有冇讨论过？边个批㗎？」