【曾智華專欄】「唔要」與「嚟真」

每逢周一及周四早上，當我進入茶記時，必聽到隔籬枱班的士大叔在哭馬喪及哭波喪（奇！點解成日輸㗎？），當然粗口滿天飛。
　　
前日朝早又上演，先哭波喪。肥叔：「頂佢頭鎚，有冇搞X錯，曼城輸畀包尾嘅修咸頓零比二？肯定打假波啦！」
　　
其實有哪個資深波及馬投注者，會不知以上兩項「運動」皆有經常性的蠱惑？若你唔知，抵你輸死未天光，太「賴依芙」也。
　　
曼城輸畀修咸頓，因「唔要」！在領隊「調教」下，搞到全場零次攻門，以保證食白果，真真「心狠手辣」！點解？因冇興趣要隻爛鬼「英聯盃」，但唔打又唔得，咁咪輸咗算囉。呢類「唔要」賽事，強隊必須百分百放軟手腳，以
保證輸波。一方面唔使晉級繼續打「盃仔賽」，更重要畀個機會「知情人士」執返多少，明未？
　　
其實「唔要」現象，馬場更多。早兩年小弟不停在揶揄莫雷拉為拉叔（拉縮），正有此含義。結果佢只一次被捉「垂手停催」，馬會寬宏大量嘞。莫蕾拉拜拜冇人歡送，活該！
　　
另一「隻手遮天」的冠軍騎師潘頓又如何？你話呢？想知，簡單，周三佢上陣的幾場，大家翻睇巡邏影片，自然「會心微笑」，必似班的士大佬猛喊：「嘩，咁都得？」
　　
有乜唔得？此乃跑馬，你估競賽小組唔知咩？不過⋯…潘頓周三只騎六隻馬（離奇，佢通常Full Book的）。結果表演精采，兩匹半冷及冷門跑第一，兩匹跑第尾。另外，死咗一隻全熱門，邊隻「嚟真」，邊隻「唔要」，作為馬迷要升呢，必須學睇「手影」！
　　
周三本欄獨提供一隻「發財先鋒」，兩倍Easy Win，無大滿足感，勝在命中！
　　
明日最具欣賞價值為第十場，明星馬眾多，我獨選「添濼意」買WP，進步中佳駟兼有分頭！