【曾智华专栏】人头猪脑必被尽告

多年前的香港《古惑仔》系列，真的有深远影响，搞到一代又一代懵仔，儍下儍下走去跟大佬，行古惑，联群结队周围凶人，以为好威。
　　
结果？一系你劈我、我劈你，搞到周身伤，兼且生活糜烂，中年已百病丛生。最弊成日在赤柱出出入入，落得经常被追捕。
　　
早几日又有一个头大冇脑青年，揸住架跑车招摇过市，因切线问题，竟「江湖大佬」上身，跳下车，狂以粗口辱骂再恐吓一名小巴司机，更明知在被拍摄情况下，自称黑社会。
　　
唉……真系「朱锦春」！慌死人唔知佢犯罪，刑事恐吓加殴打，再加自称黑社会。单单录低嘅，已涉及三条罪！
　　
好嘞，咁高调令全港震动个案，警方当然第一时间做嘢，有晒片，有晒车牌、颜色、型号，容乜易揾人吖。
　　
不过，警方行动，哎吔吔，车主惨矣。原来佢并非鸭舌帽疑犯，而是借架车畀人揸。咁就杰，再查落去，先因涉嫌「允许没有驾驶执照的人驾驶」及「协助犯可逮捕的罪行罪犯」。简简单单只借车畀人，竟搞到一身蚁。
　　
执法者有个倾向，首先是告得的，尽告。如此，肯定鸭舌帽疑犯将最少几条罪跟尾，因涉及无牌驾驶、冇第三者保险驾驶、不小心驾驶……如今正在揾窿捐，要逃避追捕也。
　　
呢名当日片中非常「威武」的江湖古惑仔，相信如今吓到鼻哥窿冇肉，唔知点收科。
　　
其实边有得匿吖，唯一可做，快快浮上水面自首。然后接受通宵扣查，先享受一下瞓「臭格」滋味，再逐条罪落口供。
　　
此案有晒人证物证，呢名「人头猪脑」肯定入罪，最少踎返几个月。因一宗切线而令自己衰成咁，再累埋朋友，真系要撼头埋墙嘞！